پاکستان کے خوبصورت ترین مقامات

19. ایوبیہ نیشنل پارک

 ایوبیہ نیشنل پارک مری سے 26 کلومیٹر دور صوبہ خیبر پختونخوا پاکستان میں واقع ہے۔ سابق صدر پاکستان جناب ایوب خان کے نام پر اس علاقے کا نام ایوبیہ رکھا گیا۔ چار مختلف پہاڑی مقامات گھوڑا گلی، چھانگلہ گلی، خیرا گلی اور خانسپور کو ملا کر ایوبیہ تفریحی مقام بنایا گیا۔ اس کا پرانا نام گھوڑا ڈھاکہ ہے جہاں انگریزوں نے ڈھونڈ عباسیوں سمیت مقامی قبا ئل اعوان، چوہدری، مغل اور گکھڑوں کو کنٹرول کرنے اور ان پر حکومت کرنے کے لیے ایک چھاؤنی بھی تعمیر کی تھی۔ ایوبیہ کے زیریں علاقوں میں دستیاب خوب صورت جھرنے اور اور بل کھاتے راستے سیاحوں کی تفریح کا سامان ہیں۔ ایوبیہ کے نشیب و فراز راستوں سے ہوتے ہوئے ہر سال ہزاروں ملکی و غیر ملکی سیاح کالابن واٹر فال کا رخ کرتے ہیں۔ جو کے قدرت کے حسیں شاہکار کا منہ بولتا ثبوت ہے۔ کالابن واٹر فال ایوبیہ سے تقریباً 13 کلومیٹر فاصلے پر موجود ہے۔

(ایوبیہ نیشنل پارک کی تصویر سلمان  علی کی البم سے لی گئی ہے)

پکنک مقامات، سیرگاہوں اور سرسبز علاقوں کہ علاوہ یہاں ایک چیر لفٹ بھی سیاحوں کے لیے کشش کا باعث ہے۔ پاکستان میں یہ اپنی طرز کی پہلی تفریحی سرگرمی تھی۔ یہ چیر لفٹ علاقے کی سیاحت کا ایک بہتر ذریعہ ہے۔ پارک میں کئی اقسام کے پرندے جیسا کہ سنہری عقاب، جنگلی کبوتر، گدھ وغیرہ پائے جاتے ہیں جبکہ جانوروں میں کالا ریچھ، جنگلی لومڑی اور لگڑبگھڑ پائے جاتے ہیں۔ ایوبیہ نیشنل پارک میں 129 برس پرانی کچرے اور مٹی میں دبی سرنگ کو اصل حالت میں اکتوبر 2020ء کو بحال کرکے سیاحوں کے لیے کھول دیا گیا۔ واضح رہے کہ ڈونگا گلی سے ایوبیہ تک ٹریک کی لمبائی 4 کلومیٹر ہے جبکہ ایوبیہ سے کوزہ گلی تک پیدل ٹریک کی لمبائی 10 کلومیٹر ہے۔ اس نیشنل پارک میں "پائپ لائن واکنگ ٹریک" بھی ہے جو ایوبیہ سے نتھیاگلی تک چلتا ہے اور اس کی لمبائی 4 کلومیٹر ہے۔ پاکستان کے دو مشہور پہاڑی مقامات مری اور نتھیاگلی کے درمیان واقع ایوبیہ نیشنل پارک سطح سمندر سے 8000 فٹ کی بلندی پر واقع ہے۔ جب آپ قدرتی جنگل میں قدم رکھتے ہیں تو آپ سرسبز و شاداب میدانوں کے قدیم نظاروں سے گھرے ہوتے ہیں جو لمبے دیودار کے درختوں اور کھڑی پہاڑی ڈھلوانوں کے پس منظر میں واقع ہیں۔