کبھی کبھی میرے دل میں خیال آتا ہے

 

لڑکپن میں جو دوست تھے  ان میں سے کسی کے بارے میں کب اندازہ تھا کہ بڑے ہو کر کون کیا بنے گا البتّیٰ چند کے لچھّن ایسے ضرور نظر آئے کہ ان کے مستقبل کے بارے اندازہ لگایا گیا کہ  فلاں لڑکا بڑا ہو کر ضرور بہت بڑا ڈاکو یا لٹیرا بنے گا کیونکہ جو لڑکپن میں ہی دو بالشہ  پانچ کمانی والا چاقو لئے پھرتا ہو اور بات بات پر ٹک ٹک  ٹک ٹک ٹک کی پانچ آوازوں کے ساتھ کھلتا اتنا بڑا چاقو  اپنی شلوار کے نیفے سے نکال کر ہوا میں لہرائے  وہ اور کیا کر سکتا ہے لیکن ایسا نہیں ہؤا ، اندازہ غلط نکلا اور وہ  پورے ملک کے ایک کونے سے دوسرے کونے تک سامان لانے اور لے جانے والے ٹرک چلاتا ہؤا ملا تو  خوشی سے گلے لگا لیا اور جتنی آؤ بھگت ہو سکی کی، اُس ٹرک ڈرائیور کی۔

(لڑکپن میں بینجو نامی ایک موسیقی کا آلہ لئے پکنک پر آئے دوستوں کے سامنے ہاسٹل سپرنٹنڈنٹ کی نگرانی میں نغمہ سرائی کرتے ہوئے فرسٹ ائیر کا طالبعلم مسرت علی)

 بالکل اس کے برعکس  وہ لڑکا جو ہر کلاس اور ہر امتحان میں اوّل پوزیشن حاصل کرنے والا پانچ وقت مسجد جاکر نماز ادا کرنے والا ایک نہائیت ہی غریب گھر کا لڑکا  بڑے ہوکر ملک کے نامور ادارے میں اچھی خاصی ملازمت چھوڑ کر ایک سیاسی پارٹی  میں شمولیت اختیار کرنے کے بعد اس پارٹی کی جنگجو    فورس میں شمولیت اختیار کر بیٹھا۔ دن رات سیاسی پارٹی کے نام پر اپنی دہشت  کے باعث اپنے محلّے کے علاوہ دیگر محلوں میں بھی خاصا بدنام ہو چکا تھا کہ ایک روز میڈیا پر اس کی مشہور ِ زمانہ پولیس مقابلہ کی خبر چلتے ہوئے دیکھ کر کچھ عجیب سی کیفیت ضرور ہوئی لیکن ایک نتیجہ ذہن نے ضرور نکالا :-

" اپنی تقدیر ہم خود اپنے ہاتھوں سے بناتے ہیں ، کامیابی کی صورت میں اپنا کارنامہ گردانتے ہیں جبکہ ناکامی کی صورت میں اللہ کو موردِ الزام اتنی خوبصورتی سے ٹھہراتے ہیں کہ اللہ کو ناگوار بھی نہ گذرے، یہ کہہ کر  کہ "جو اللہ کی مرضی"

کبھی کبھی میرے دل میں خیال آتا ہے کہ ہم ایسا کیوں کرتے ہیں؟